ڕه‌وه‌ند

وێڕای چاوخشاندنەوەیەکی خێرا بە ماوەی نزیک بە ساڵێک لە هاتنەئارای پرۆژەی ڕەوەند و سەرنجدانێکی سەرپێیی لە خاڵە لاواز و بەهێزەکانی ئەو پڕۆژەیە و دەست لەکارکێشانەوەی هەندێک لە هاوڕێیان لەپڕۆژەکە؛ ئەم خاڵانەی خوارەوەش پێداگریان لەسەرکرایەوە:

1-    تائێستا ڕەوەند پڕۆژەیەکە لەسەرەتای کاریدایە و هەنگاوهەڵدەگرێت بەرەو هێنانەدی خەتێکی فکری-سیاسی مونسەجیم و سەربەخۆی خۆی:

A- هاوفکری و هاوخەتی سیاسی هاوڕێیان لەناو ئەو پڕۆژەیەدا بەرهەمی پڕۆسەیەکە لە دیالۆگێکی فکری-سیاسی، نەک شتێک بێت پێشوەخت لەبەردەستدابێت. بۆیە بۆچون و لێکدانەوەی فکری و سیاسی جیاواز، ناتەبایی و کۆک نەبون لەناو هاوڕێیاندا شتێکی سروشتیە. بەڵام لە پڕۆسەیەکدا ئەبێت ئەو هاوفکری و هاوخەتیە بەشێوەیەکی گشتی بێتەدی، ئەگەر "ڕەوەند" بیەوێت وەک خەتێکی فکری-سیاسی و لەدوائاکامیشدا حیزبی جیاواز لە ڕەوت و ڕێکخراوە و حیزبەکانی ئێستای ناو بزوتنەوەی چەپ و "کۆمۆنیستی" دەرکەوێت.

B- دەخالەتی عەمەلی چالاک لە ناڕەزایەتیە جەماوەریەکان و بزوتنەوە ئازادیخواز و دیموکراتیکەکاندا. هەوڵدان بۆ جێگیرکردنی خەتێکی ڕادیکاڵی چەپ، مارکسیستی و کرێکاری لە دەرونی ئەم بزوتنەوە ناڕەزایەتیە جەماوەریانەدا.

C- هەرلەوکاتەدا کە هاوکاری عەمەلی و هاوئاهەنگکردنی کاروچالاکی لەگەڵ باقی حیزب، ڕێکخراو و کۆروکۆمەڵی چەپدا دەکات لەدژی بزوتنەوە کۆمەڵایەتیەکانی بۆرژوازی لەهەمانکاتیشدا ڕەخنە فکری وسیاسیەکانی خۆی لە تەواوی بزوتنەوەکە و لە حیزب و ڕێکخراوەکانیشی درێژە پێدەدات. ئەمەش لە خزمەت گەشەپێدانی فکری مارکسیزم و بەرجەستەکردنەوەی خەتێکی کرێکاری و مارکسیستی رەسەن دەبینێتەوە.

2-    دوو پڕۆژەی سیاسی:

A- چالاککردنی ماڵپەڕی "ڕەوەند" وەک ماڵپەڕێکی جیاواز لەو ماڵپەڕانەی کە ئێستاهەن ئەویش بەئاڕاستەکردنی رێبازی ماڵپەڕەکە بە ئاقارێکی دیاریکراودا کە ببێتە مەڵبەندێک بۆ باس و دیالۆگی بابەتەکانی بزوتنەوەی چەپ و کۆمۆنیستی و کرێکاری و هەڵسوڕاوانی. کردنەوەی تەوەرەی جیاجیا و وروژاندنی بابەتی جیاجیا لەو مەیدانانەدا. هاوڕێ هیدایەتی مەلا عەلی بەرپرسیاریەتی سیاسی ئەو پڕۆژەیە ئەگرێتە ئەستۆ بە هاوکاری و کۆمەگ وەرگرتن لە هاوڕێیان عمر خەتات و نادر عبدالحمید.

B- پڕۆژەی "تۆڕی پەیوەندیە نێونەتەوەییەکانی کرێکارانی عێراق". لە پێناو دامەزراندنی پەیوەندیەکی نێونەتەوەیی بۆ بزوتنەوەی کرێکاری عێراق و هێنانەدی هاوپشتیەکی نێونەتەوەیی بۆ ئەو بزوتنەوەیە. بەرپرسیارەتی سیاسی ئەم پڕۆژەیە هاوڕێ نادر عبدالحمید ئەیگرێتە ئەستۆ بە هاوکاری و کۆمەگی هاوڕێیان ڕزگار ساڵح و گۆران ڕەشید.

3-    هەوڵدان بۆ بەرجەستەکردنەوەی خەتی فکری-سیاسی "ڕەوەند" لە بڕیارنامەی جیاجیادا لەوانە لەسەر ئەوزاعی سیاسی عێراق و کوردستان، بزوتنەوەی کرێکاری و کۆمۆنیستی، شێوازی مامەڵە لەگەڵ حیزب و ڕەوتە فکری-سیاسیەکانی گۆڕەپانی عێراق و کوردستان.

4-    کاروبای مالی و ئابونە سەروسامانی پێدەدرێت و لەمەولا مانگانەی هەرهاوڕێەک بە 10 دە یۆرۆ دەستننیشان کرا.

5-    کاروباری تەکنیکی ماڵپەڕی "ڕەوەند" سەروسامانی پێدەدرێت.

ڕەوەندی سۆشیالیستی کرێکاری

6 ی تەموزی 2010