ڕه‌وه‌ند

هاوپشتی: هه‌ندێک له‌ده‌زگاو که‌ناڵه‌کانی راگه‌یاندن به‌ خۆپیشاندانی ناوده‌بات و هه‌ندێکی تریش به‌ ئاژاوە و پیلانگێری و دواتریش به‌ سوتاندن و زیانگه‌یاندن به‌ ماڵ و حاڵی هاوڵاتی پیشه‌وه‌ر، سوتاندنی بارەگا تەواو ئەبێت. ئێوە چ خوێندنەوەیەکتان بۆ سەرهەڵدانی ئەو ڕووداوە لەم کاتەدا هەیە؟

نادر عبدالحمید: ئەوەی کە چ ناوێك لەو دیاردەیە، لەو ڕوداوە دەنرێت مەسەلەیەکی پلە دوویە لەچاو هەڵسەنگاندنی ناوەڕۆکەکەی. چەمکی خۆپێشاندان لە خودی خۆیدا هیچ جۆرە پیرۆزیەك لەخۆی ناگرێت، ئەوەی کە بەهایەکی دەداتێ ناوەڕۆکی خۆپێشاندانەکەیە وەك ڕوداوێك نەك شکڵەکەی. من ترسێکم نیە لەوەی کە ڕوداوەکەی زاخۆ بە خۆپێشاندانی جەماوەری ناو بەرم، بەڵام بە خۆپێشاندانێکی کۆنەپەرستانەی جەماوەری ناودەبەم. لە هەمان کاتدا ئاژاوە و پلانگێریش نیە. فکر ناکەم حزبێکی دیاری کراوی وەك "یەکگرتووی ئیسلامی" بە پلان و نەخشەی داڕێژراوەوە لەو ڕۆژە دیاریکراوەدا ئەو بەشە لەجەماوەری نوێژکەری زاخۆی هێنابێتە سەرشەقامەکان بۆ خۆپێشاندان، گەرچی دەکرێت حزبێکی ئیسلامیش ئەو کارە بکات بەڵام ئەوەی کە ڕوی داوە ئەو واقعیاتە دەرناخات "یەکگرتوو" بە پێی نەخشە و پلانێکی داڕێژراوی پێشوەخت کاری بۆ ئەو ڕوداوە کردبێت، وەئەوە بەو مانایەش نیە کە "یەکگرتوو" بێئاگا بوبێت و هیچ کاریگەریەکی ڕاستەوخۆ و ڕۆڵی تیا نەبووبێت. ئەم خۆپێشاندانە زۆر ڕون و ئاشکرا جێ پەنجەی ئیسلامی سیاسی پێوەیە، هەر لە وروژاندن و دنەدانی جەماوەری نوێژکەرەوە بیگرە لەلایەن وتاری مەلای ئەو مزگەوتەوە کە ئەم خۆپێشاندانە لێیەوە دەستی پێکردوە لە هەمان ڕۆژ و سەعاتدا، تا دەگات بە دەستپێشکەری و هونەرنواندنی هەڵسوڕاوانی حزبە ئیسلامیەکان لە هەڵخڕاندنی هەرچی زیاتری جەماوەری شار بۆ هەڵمەت و پەلامار لە زاخۆ و پاشان تەشەنە پێکردنی بۆ شارۆچکەکانی تریش. بەڵام لەگەڵ هەموو ئەمانەشدا ناکرێت وەكو ئاکسیۆنێکی سیاسی حزبێکی دیاری کراو لێکبدرێتەوە. بە پێچەوانەوە ئاشکرا دیارە کە هەڵمەت بردنە سەر بارەگاکانی "یەکگرتوو"، ئاکسیۆنێکی رێکخراو و ئامانجدارە کە دامودەزگاکانی "پارتی" وەك پەرچە کردارێكی دەستبەجێ و خێرا پێی هەڵساون و گورزی خۆیان وەشاندوە، ئەمەیان هیچ پەیوەندیەکی بە جەماوەر و خۆپێشاندانەوە نیە.

خاڵێکی ئیجابی ئەم خۆپێشاندانە جەماوەریە کۆنەپەرستانەیە ئەوەیە کە دەریخست خەڵکی دەڤەری بادینانیش وەك باقی ناوچەکانی تری کوردستان، دەسەڵاتی گەندەڵ و سەرکوتگەری "پارتی" و "یەکێتی" تاسەر ئێسقان برینداری کردون، وە لەفرسەتێك دەگەڕێن توڕەیی و داخی دڵی خۆیان هەڵڕێژن. بەڵام ئەو باروزروفە سیاسیەی کە ئەو هەلە لە دووتوێدا ڕەخساوە لە ئێستای زاخۆ و دەڤەری بادیناندا، کە ئەو ڕق و توڕەیی و داخ لەدڵیەی جەماوەر تیا بتەقێتەوە، ئەو باروزروفە وای کردوە کە بە ئاقارێکی ئیسلامی سیاسی کۆنەپەرستانەدا کەناڵێزە بکرێت و لەهەرجۆرە ناوەڕۆکێکی ئازادیخوازانە و عەدالەتخوازانە بەتاڵ بکرێتەوە. بەدڵنیاییەوە ئەگەر ئەو جەماوەرەی زاخۆ لە بەهاری ئەمساڵ و گەرماوگەرمی شۆڕشەکانی بەهاری عەرەبی و خۆپێشاندانەکانی دەڤەری سۆرانی هەرێمی کوردستاندا ئەو فرسەتەیان بۆ بڕەخسایە کە داخی دڵی خۆیان دژی دەسەڵاتی "پارتی" هەڵڕێژن، ئەوا نە لەو شکڵەدا و نە بەو ناوەڕۆکە هەڵنەدەڕژایە سەر شەقامەکان کە ڕۆژی هەینی دوو 2 ی دێسەمبەر بینیمان. من لێڕەدا ئەمەوێت سنوربەندی لەگەڵ لێکدانەوەیەك بکەم کە ئەو ڕوداوانەی زاخۆ و دەڤەری بادینان وەك ئاکسیۆنێکی سیاسی حزبێکی ئیسلامی سیاسی وەك "یەکگرتوو" لێکدەداتەوە. لەسەرەوە ئاماژەم بەوەدا کە ناکرێت ئەو حزبە لە هاوکێشەکە بکرێتەدەرەوە، بەڵام گرفتی لێکدانەوەیەکی لەوجۆرە ئەوەیە کە چاو دەنوقێنێت لە ئاست ڕوحیەتی ئامادەی جەماوەری زاخۆ بۆ هەڵچونی خۆبەخۆیی و هەڵڕژانە سەرشەقامەکان کە ئەو فرسەتەی داوەتە ئیسلامی سیاسی تا کەناڵێزەی بکات.

هاوپشتی: بە درێژایی خۆپیشاندانەکانی چەند مانگی رابردوو دژ بە گەندەڵی سیاسی و دارایی و داواکاری بۆ چاکسازی و مافە سەرەتاییەکان و ئاڵوگۆر. هیچ جۆرە خۆپیشاندانێک لە ناوچەی بادینان بەڕێو نەچوو، ئایا بۆ کتوپڕ لەسەر بانگەوازی مەلایەک سەدان گەنج کۆبوونەوە و بە خێرایی ئەمە ریکخرا؟

نادر عبدالحمید: ئەوەی کە بۆچی لە چەند مانگی ڕابردوودا لەلایەن خەڵکی زاخۆ و دەڤەری بادینان هاوڕای دەڤەری سۆرانی هەرێمی کوردستان دژ بەگەندەڵی خۆپێشاندان بەڕێوە نەچوو، مانای ئەوە ناگەێنێت کە خەڵکی ئەو ناوچانە، ئەو خواستانەیان نەبوە کە جەماوەری شارەکانی تری کورەستان بۆی هەڵڕژابونە سەر شەقامەکان. بۆ ئەوەی جەماوەر هەڵڕژێتە سەرشەقام پێوست بە شکڵگرتنی ئیرادەیەکی سیاسی دەکات لە چرکە ساتێکی مێژوویدا. ئەوە کە بۆچی لەو کاتەدا هاوڕای دەڤەری سۆران لە دەڤەری بادینانیش ئەو ئیرادە سیاسیە شکڵی نەگرت یان باشترە بڵێین ڕێگە گیرا لە شکڵگرتنی و هەر لەسەرەتادا لەباربرا، دەگەڕێتەوە بۆ زۆر هۆکار و فاکتۆر: هەر لە سەرکوت و زەبروزەنگی "پارتی"ەوە بگرە تا لاوازی پایەگای حزب و ڕەوتە فکری و سیاسیەکانی تر، تا جۆری ژیانی ئابوری و پێکهاتەی چین و توێژەکانی، تا فاکتۆری مێژوویی و کڵتوریی لە لاوازی و کەم ئەزمونی لە تەقالیدی دەربڕینی ناڕەزایەتی و سوننەتی خۆپێشاندان لە ناوچەکەدا، .... وە ئەوەش کە وەك دەڵێن کتوپڕ و بەخێرایی بەدوای وتاری مەلای مزگوتێكدا هەڵدەڕژێنە سەر شەقامەکان، نەك بۆ هەڵمەت بردنە سەر دامودەزگاکانی "پارتی" و حکومەتی هەرێم بەڵکو بۆ هەڵمەت بردنە سەر چەند شوێنێکی مەدەنی، نیشانەی ئەوەیە کە خەڵکی لەو دەروازە و تونێلە دیاریکراوانەوە دێنەمەیدان کە نایانەوێت ڕاستەوخۆ ڕوبەڕوی دەسەڵات ببنەوە لە حاڵێکدا خۆپێشاندانەکانی بەهاری ئەمساڵ ڕاستەوخۆ ڕوبەڕوی دەسەڵات بوو. ئەمەش نەك هەر پەیوەستە بە تەرازووی هێز لەنێوان دەسەڵاتی ملهوڕی "پارتی" و بێهێزی جەماوەری دەڤەری بادینان بەڵکو پەیوەستیشە بە ڕۆڵی بزوێنەرانە و ڕەهبەریانەی ئیسلامی سیاسیەوە بۆ هێنانەدەرەوەی ئەو تەکانە جەماوەریە بەدژی دەسەڵات، کە بەم جۆورە لە میکانیزم، نفوزی فکری و سیاسی و حزبی خۆی پەرەپێدەدات و دەسەڵات لاواز دەکات.

ئەڵبەتە ئەگەر بمانەوێت وێنەیەکی کۆك و هەمەلایەن  (جامع و شامل) لەو هاوکێشەیە بدەینە دەستەوە ئەوا دەبێت فاکتۆرە دەرەکیەکانی وەك باڵادەست بوونی ئیسلامی سیاسی بەدوای لەباربردن و دامرکاندنەوەی شۆڕشەکانی باکوری ئەفریقا و لاوازبوونی پایەگای ناسیونالیزمی کورد لە دەوڵەتی مەرکەزی عێراقدا لەچاو ساڵانی ڕابردووشی بخەینەسەر. ئەمە جگە لەدەستبەسەراگرتنی "دەزگای خێرخوازی بارزانی" بەسەر ئەو بڕە پارەیەی "یەکگرتوو" کە لە دەوڵەتە کۆنەپەرستەکانی کەنداو وەریگرتوە بۆ دابەشکردنی بەناوی خێڕوسەدەقەی ئیسلامیەوە بەسەر ئەو منداڵانەدا کە سەربە خێزانی هەژارن یان دایك و باوکیان لەدەستداوە، کە لە دوو سێ هەفتەی ڕابردوودا جەنگێکی ساردی نێوان "پارتی" و "یەکگرتوو"ی هێنابوە ئاراوە. ئەمەش بەدەوری خۆی کۆمەگی کردوە بە کامڵ کردن و هەڵتۆقینی ئەو دیاردەیە. بەم شێوەیە ئەم ڕوداوە سەنتەری بەیەکگەیشتنی جۆرەها توخمە (موئەلەفەیە)، کە هەریەکە لە گۆشەیەکەوە هاتۆتە ئەم ناوچەیە و بەشدار بوە لە هەڵتۆقاندییدا. لێڕەوە گەرچی لەڕوی شکڵەوە وادەردەکەوێت کە ئەم دیاردەیە کوتوپڕ هەڵتۆقیوە بەڵام لێکدانەوەی ماتریالیستیانە لە شیکاری فکریدا شۆڕدەبێتەوە بۆ ڕیشەی مێژوویی و توخمە پێکهێنەرە واقعیەکانی ئەو دیاردەیە، کە چۆن لە پڕۆسەیەکدا کامڵیان کردوە و تەقاندویانەتەوە. لێرەدا "کوتوپڕی" شوێنێکی بۆ نامێنێتەوە لە ئیعرابدا.

هاوپشتی: سه‌باره‌ت به‌رۆڵی په‌رله‌مان و حكومه‌ت، زۆر کەس پێیان وایە ئه‌و دو ده‌زگایه‌ لاواز و ناچالاكن و ناتوانن رۆڵی خۆیان ببینن. بەڕای ئێوە لە ئێستادا چ شتێک زەمانەتی پاراستنی مافەکانی خەڵکە؟

نادر عبدالحمید: ئەوە ڕاستە ئەو دوو دەزگایە؛ واتا پەرلەمان و حکومەتی هەرێمی کوردستان، نەك هەر لاواز و ناچالاکن بەڵکو فۆڕماڵ و بەمانایەكیش کارتۆنین. لە پشت ئەم ڕاستیەوە ڕوانگە و ئاسۆیەکی لیبڕاڵانە خۆی مەڵاس داوە، کە هەوڵدەدات چالاکی فکری و سیاسی نەك هەر هێزە سیاسیەکانی کوردستان، بەڵکو ناڕەزایەتی و خواستەکانی جەماوەریش بەو ئاقارەدا ئاڕاستە بکات کە ببێتە بەهێزکردنی ئەو دوو دامەزراوە "دەوڵەت"یە لە کوردستاندا. لە پێناو هێنانەدی "دەوڵەتی یاسا یان دەوڵەتی مەدەنی" کە لەسەر بنەمای هاوڵاتی بوون ماف و ئەرکەکانی هاوڵاتیان دیاری بکرێت نەك لەسەر بنەمای دورو نزیکی لە حزب و بنەماڵە و دەسەڵاتێکی سەرویاسایی ... بە دڵنیاییەوە بەهەر ئەندازەیەك ئەم پڕۆسەیە بچێتە پێشەوە خەڵکی لە مافێکی زۆرتر و ژیانێکی ئارامتر بەهرەمەند دەبن لەچاو ئێستا، بەڵام گرفتی ئەم ڕوانگە و ئاسۆ سیاسیە لەوەدایە کە ئەمە دادەنێت بە دەرمانی چارەسەری هەموو دەردەکانی خەڵکی کوردستان. لە حاڵێکدا ئەگەر سەیری یۆنان یا ئیتالیا و ئیسپانیا بکەین گرفتێکی لاوازی و کارتۆنی پەرلەمان و حکومەت لە ئارادانیە و بە پێچەوانەشەوە حکومەت و پەرلەمانی بەهێز و چالاك لەو وڵاتانەدا بەشێکن لە ڕۆژ ڕەشی خەڵکی ئەو وڵاتانە کە هەڵڕژاونەتە سەرشەقامەکان بەدژی ئەو دوو دامەزراوە تا ئەو یاسایانە پەسەند نەکەن کە هەوڵدەدات قەیرانی ئابوری سەرمایەداری لەسەری خەڵکەکەیدا بشکێنێتەوە.

ئەمە ئاڵتەرناتیڤێکی فکری - سیاسیە لەبەرامبەر بارودۆخی سیاسی ئەمڕۆی کوردستاندا، وە پێکهاتوە لە بەرەیەکی بەربڵاو و فراوان: هەر لە ئیسلامی لیبڕاڵەوە بیگرە تا سوپایەك لە قەڵەم بەدەستانی ڕۆژنامە ئەهلی و میدیاکارانی سەربەخۆ لە دەسەڵات، تا "بزوتنەوەی گۆڕان" و دەیان کۆڕوکۆمەڵی فکری و ئەدەبی و هونەری و ...، گەرچی بەشی زۆری کەرەستەی ئەم ئاڵتەرناتیڤە ناسیوناڵ-لیبڕاڵە بەهەردوو بەشی عەلمانی و ئیسلامیەوە لە جێگەوڕێگەیەکی ئۆپۆزیسیۆنیدایە بەرامبەر بە دەسەڵاتی هاوبەشی "پارتی و یەکێتی" بەڵام لە دەرونی دەسەڵاتیشدا توێژێکی بەرچاوی لیبراڵیش هەیە لە تەکنۆکرات و تیۆریسن و ستراتیژ داڕێژەران کە بەهەمان ئاراستە لەناوەوەڕا کاری خۆیان دەکەن. ئەمە پڕۆسەی شکڵگیری دەسەڵاتی بورژوازی وەیا باشترە بڵێین کامڵ کردنی ئەو دەسەڵاتەیە بەبان سەری خەڵکی کوردستان و ئیرادەیانەوە لە میانەی کێشمەکێش و هاوکاری ڕەوتە سیاسی و ئایدیۆلۆژیەکانیەوە.

گەرچی کێشە و ناکۆکی لە نێوان باڵی عەلمانی و ئیسلامیدا هەیە لەسەر پلە و دەرەجەی ئیسلامی بوونی ئەو ئاڵتەرناتیڤەیە بەڵام ئاسۆی چینایەتی و درێژماوەیان یەکە لە هێنانەدی "دەوڵەتی یاسا یان دەوڵەتی مەدەنی" بە تێکەڵەیەك لە عەلمانیەت و لە ئیسلامیەت، وە ئەمەش بنەمای هاوکاری ئەم دووبەشە ناکۆکەیە لەئێستادا. هاوکاری "بزوتنەوەی گۆڕان" لەگەڵ حزبە ئیسلامیەکاندا و هوتاف کێشانی ئەڵڵاهو ئەکبەری ناسیوناڵ-لیبراڵێکی وەك "ڕێبین هەردی"ش لە چڵەپۆپەی خۆپێشاندانەکانی شاری سلێمانیدا، لە بەهاری ئەمساڵدا، دروست ئەو هاوبەشیە لە ئاسۆی چینایەتی ئەو دوو بەشە لە عەلمانی و ئیسلامی دەردەخات. ئەم بەرە بەرفراوانە فشارێکە لەمڕۆدا بەسەر دەسەڵاتەوە و "پارتی و یەکێتی" تا ڕاددەیەك تەنگەنەفەس کردوە، و ناچاری دەکات هەنگاوە کیسەڵیەکانی خێراتر بکات لانی کەم لەهەندێ ڕیفۆڕمی یاسایی و خزمەتگوزاریدا.

ئاسۆی ناسیۆناڵ لیبڕاڵ (بەهەردوو بەشی عەلمانی و ئیسلامیەوە) ئاسۆیەکی سیاسی زاڵە لەمڕۆی گۆڕەپانی کێشمەکێشە فکری و سیاسیەکانی کوردستاندا. گەرچی لەڕووی شکڵیەوە کێشەی ئەم ئاسۆیە و ئەم بلۆکە کۆکتێلە سیاسیە لەگەڵ دەسەڵاتدا دەردەکەوێت، بەڵام لە ناوەڕۆکدا کێشەی ئەسڵی ئەم بلۆکە کۆکتێلە، چۆنیەتی کۆنتڕۆڵکردن و هەوسارکردنی ناڕەزایەتی خەڵك و  بزوتنەوە ناڕەزایەتیە جەماوەریەکانە تاوەك پارسەنگێکی قورسی سیاسی لە بەرامبەر دەسەڵاتدا بەکاری بهێنێت، جا چ بۆ کۆتا کردنی دەستی دەسەڵات و ناچارکردنی بەدانی ئیمتیازات لە سەوداومامەڵە لەگەڵیا، یان چ لەوە باشتر لەسەر شانی ناڕەزایەتیەکانی خەڵکی کوردستانەوە بگەنە دەسەڵات. ئەڵبەتە کێشمەکێشی سکتی (فیئەوی Sect) و حزبی لە نێوان باڵ و ڕەوتە جۆراوجۆرەکانی ئەو بەرەیەدا هەیە لەسەر بردنی بەشی شێر لەم دەسکەوتەیە. چ کێشمەکێشی ئەو بلۆکە کۆکتێلە سیاسیە وەك بەرەیەك لەدژی دەسەڵات و چ کێشمەکێشە فیئەوی و حزبیەکانی ناوخۆیان ئەو پڕۆسەیە و ئەو میکانیزمە پێکدەهێنێت کە هەژمونی ئاسۆی سیاسی ناسیوناڵ-لیبڕاڵ وەك ئالتەرناتیڤێك مسۆگەر دەکات لە کۆمەڵگەدا و کۆنتڕۆڵی ناڕەزایەتی و تەکان و تەقینەوە و خۆپێشاندانەکان و بزوتنەوە ناڕەزایەتیەکانی جەماوەری پێدەکات.

زەمانەتی پاراستنی مافەکانی خەڵك لەم پڕۆسە ناسیوناڵ-لیبراڵە و ئاسۆ سیاسیەکەی و ئاڵتەرناتیڤەکەیدا نیە، لە هێنانەدی حکومەت و پەرلەمانێكێکی چالاك و بەهێزدا نیە. هەروەك لەسەرەوە ئاماژەمان پێکردوە نە لە یۆنان و نە لە ئیتالیا بونی حکومەت و پەرلەمانی بەهێز و چالاك، بونی دەوڵەتی مەدەنی و سەروەری یاساش زەمانەتی مافەکانیانی نەکردوە و  گرفتی خەڵك لەشوێنی خۆی ماوەتەوە. ڕێگەی واقعی هاتنەمەیدانی جەماوەرە بە خواستی سیاسی و ئابووری ڕۆشنەوە، بۆ ئازادی تەواوی فکری و سیاسی، بۆ جیاکردنەوەی ئایین لە دەوڵەت و لە خوێندن، بۆ خۆشگوزەرانی و بەدەستهێنانی بیمە کۆمەڵایەتیەکان. ئەمەش لەڕێگەی خۆڕێکخستنەوە لە ڕێکخراوە جەماوەری و پیشەییەکاندا بۆ پاشەکشەکردن بە دەسەڵاتی ملهور و گەندەڵی پارتی و یەکێتی. هەر ئەم خەباتەشە لە پەرەسەندنی خۆیدا ڕێگە دەدات بەجەماوەری کرێکار و زەحمەتکێش کە ئەم دەسەڵاتە بە تەکانێکی شۆڕشگێڕانە بخەنە لاوە و لە شوێنیدا دەسەڵاتدارەتی شۆراکانی خۆیان دامەزرێنن.

هاوپشتی: پێت وایە چارەسەر چییە بۆرێگرتن لە دووبارەبوونەوەی باردوخێکی لەم چەشنە؟ تاکەی یەکلاکردنەوەی ناکۆکی سیاسی هێزە سیاسیەکان لەسەر حیسابی تێکچونی ئاسایش و ئارامی ژیانی خەڵکی کوردستان ئەچێتە پێش؟

نادر عبدالحمید: ئەو بارودۆخە ناهەموارە لە کێشمەکێش و پێکدادانی حزب و هێزە سیاسیەکان کە هەرماوە ناماوەیەك ئاسایش و ئارامی هاوڵاتیان دەشێوێنێت و دەیانخاتە دڵەڕاوکێوە، بەرهەمی دەسەڵاتدارەتی ناسیونالیزمی کورد، پەرەسەندنی ئیسلامی سیاسی و باڵادەستی ئاسۆی ناسیوناڵ-لیبڕاڵە بەسەر کۆمەڵگەی کوردستاندا. تەنها ڕێگەی واقعی لاوازکردن و وەدەرنانی ئەو بزوتنەوە کۆمەڵایەتیانە و حزب و ڕەوتە فکری و سیاسیەکانیانە لەمەیدانی سیاسیدا. ڕاستە ڕەخنەی فکری و سیاسی ڕۆڵی خۆی دەبینێت بەڵام ئەوە هێنانەمەیدانی بزوتنەوەیەکی سەربەخۆی جەماوەری کرێکار و زەحمەتکێشە، بەخواستی ئازادیخواز و عەدالەتخوازی ڕۆشنی خۆیەوە لەدەرەوەی ئۆپۆزیسیۆنی ئیسلامی و ناسیونال-لیبرال، بەدژی دەسەڵاتی گەندەڵ و سەرکوتگەر، کە دەتوانێت بە عەمەلی ئەو کارە ئەنجام بدات، هەر لێرەشدایە کە تیۆری شۆڕشگێرانەی مارکسیستی ڕۆڵی خۆی دەبینێت وەك چرای ڕێگە ڕۆشنکەرەوە. هەربۆیە ئەرکی دەستبەجێی ئازادیخوازان، بزوتنەوەی چەپ و کۆمۆنیستی کوردستان لە ئێستادا هەوڵدانە بۆ جیاکردنەوەی ڕیزی ناڕەزایەتی جەماوەر و بزوتنەوەی شۆڕشگێرانەیان لە ڕەوتە ناسیوناڵ-لیبڕاڵ و ئیسلامیەکان. هەر ئەم ڕێگا عەمەلیەشە، بەردەگرێت بەوەی فەزای جەنگ و کێشمەکێشی ناسیونالیزمی سەرکوتگەر و هێزە ئیسلامیە کۆنەپەرستەکان خەباتی ڕەوای جەماوەر دژی ئەم دەسەڵاتە لەبارببات و بیانکاتە سوتەمەنی جەنگ و کێشمەکێشەکانی نێوانیان.

This e-mail address is being protected from spambots. You need JavaScript enabled to view it

07-12-2011