ڕه‌وه‌ند

بەشداری نادر عبدالحمید لە "فۆڕومی دۆخی نوێی کوردستان و چی دەبێ بکرێ!" Print
Tuesday, 26 December 2017 14:39

بۆ پرنت کردن، داگرتن وەیا خوێندنەوەی ئەم بابەتە لە شکڵی (پی دی ئێف)دا کلیک لەسەر ئێرە بکە.

هاوپشتی: بەدوای ١٦ ئۆکتۆبەر دۆخێکی تازە هاتۆتە پێش، لە ڕوانگەی ئێوە خەسڵەتەکان و پێکهێنەرەکانی ئەم دۆخە چین؟

نادر عبدالحمید: بۆشایی سیاسی خاڵی هەرەسەرەکیە وەک خسڵەت و پێکهێنەری ئەم دۆخە. بەو مانایە کە دەسەڵاتی هەردوو حزبی "پارتی" و "یەکیەتی" لە دەوڵەتێکی لۆکاڵیدا، شکستێکی تەواوی بەسەردا هاتووە، بەڵام ئەوەی سەرکەوتنی بەدەستهێناوە (دەوڵەتی ناوەندی و حکومەتی حەیدەر عەبادی) لەڕووی یاسایی و لەباری عەمەلی و سەربازیەوە ئەو تواناییەی نیە کە ئەو دەوڵەتە لۆکاڵیە تەواو بگرێت و چۆن خۆی بیەوێت شکڵی پێبداتەوە و بەڕێوەی بەرێت. لەناوخۆی کوردستانی عێڕاقیشدا نە ئۆپۆزیسیۆنێکی قەومی-ئیسلامی بەهێز و بە ئیتۆریتە لەئارادایە کە بتوانێت ئەم دەسەڵات وەلاخات، وە نە بزوتنەوەی چەپی ڕادیکاڵ و کۆمۆنیزمی کوردستانیش بوەتە ئاڵتەرناتیڤ  و بژاردەیەک.

 

هاوپشتی:  مەیدانە ئەسڵیەکانی ڕوبەروبوونەوەی کۆمەڵایەتی و بە تایبەتی چینایەتی کامانەن؟

نادر عبدالحمید: قەیرانی ئابووری، وەستانی پڕۆژە ئابووریەکان، دانەمەزراندنی دەرچوانی خوێندگا و پەیمانگاکان، بێکاری، نەبوونی خزمەتگوزاریەکان، دواکەوتنی موچەی مانگانەی کارمەند و کرێکاران، ئەمانە وێڕای سەرکوتی ئازادیەکان، بونەتە هۆکاری ناڕەزایەتی ڕۆژانەی خەڵکی. بەم پێیە ناڕەزایەتیەکان بەرامبەر بە بارودۆخی نالەباری ژیان و سەرکوتی ئازادیەکان، بونەتە مەیدانە ئەسڵیەکانی ڕوبەروبوونەوەی کۆمەڵایەتی-سیاسی و چینایەتی.

لەدوای 16 ئۆکتۆبەریشەوە، هێرش و داگیرکاری سوپا و حەشدی شەعبی، ئاوارەیی و دەربەدەری خەڵکی کوردستان، پلەدوویی و سەرهەڵدانەوەی ستەمی میللی، گەرچی هێندەی تر ئەم بارودۆخەیان تڕاژیدیایی تر کردۆتەوە، بەڵام نەبوەتە بنەمای سەرهەڵدانی بزوتنەوەیەکی جەماوەری سەربەخۆ لە ناسیونالیزمی دەسەڵاتداری کورد.

ئەم ناڕەزایەتیانە ڕاستەوخۆ ڕوویان لە دەسەڵاتی هەرێمەکەیە کە بەرپرسی سەرەکی هاتنەئارای ئەم دۆخەیە، هەرجۆرە هاتنەمەیدانێک بەدژی نەبوونی خزمەتگوزاریەکان وەیا بۆ خواستێکی ئابووری و پێدانی مووچە دواکەوتووەکان ڕاستەوخۆ سەردەکێشێت بۆ ڕووبەڕووبوونەوەیەکی سیاسی بەرامبەر دەسەڵات. زوربەی ناڕەزایەتیەکان، لە دووتوێی بارودۆخی سیاسی ئەمڕۆدا، شکڵ و شێواز و مانا و ئاڕاستەی سیاسی بەخۆیانەوە دەگرن. ئەمەش ڕێکدێتەوە لەگەڵ ئەو خاڵەدا کە مەیدانی هەرە سەرەکی ململانێی سیاسی-چینایەتی پڕکردنەوەی ئەو بۆشاییە سیاسیەیە لەمڕۆی کوردستاندا.

هاوپشتی:  جموجۆڵ و هەوڵ و تەقەڵا بۆ ئاڵوگۆڕلە کوردستان هەمیشە یەکێک لە پێکهێنەرەکانی دۆخی کوردستان بووە ئاسۆی ئەم جموجۆڵە چۆن دەبینیت؟

نادر عبدالحمید: ساڵانی (2012-2003) باڵادەستی ئایدیاڵەکانی ناسیوناڵ-لیبڕاڵی هاوپەیمانی ئیسلامی سیاسی بوو بەسەر ناڕەزایەتیەکان و کردنیان بوو بە دەستمایەی مامەڵە و وەرگرتنی ئیمتیاز لە دەسەڵات. بەڵام لەدوای 2013 وە بارودۆخێکی ئابوری-کۆمەڵایەتی و سیاسی-فکری تازە خەریکی شکڵ گرتنە و کوردستان دەباتە ناو ڕەوەندێکی مێژوویی ترەوە، کە تیایدا بەرەبەرە مەزاجی سیاسی خەڵکی کوردستان وەردەچەرخێ ڕووەو هاتنەدی ئاڵوگۆڕی ڕیشەیی. ئەمەش ئامادەبوونی زەمینەیەکی لەبارە بۆ جێکەوتنی ئاسۆی چەپ و کۆمۆنیزم و بەرزبونەوە بۆ ئاست بزوتنەوەیەکی سەرتاسەری بۆ هەڵپێچانی دەسەڵات لە هەرێمی کوردستانی عێڕاق و جێخستنی ئاڵتەرناتیڤێکی کۆمۆنیستی (حکومەتێکی سۆشیالیستی و دەوڵەتێکی شۆرایی) لە جێگەی حکومەتێکی قەومی و دەوڵەتێکی پەرلەمانی کارتۆنی.

هاوپشتی:  لە ڕوانگەی ئێوەوە بۆ پەرەگرتنی جوڵانەوەیەک کە مەبەستی ئاڵوگۆڕ و دەرهێنانی کوردستان لە دۆخی ئێستا بەرفراوانکردنەوەی مەودای ئازادی و یەکسانی تا گەیشتن بە ئامانجە ئازادیخوازی و یەکسانیخوازیەکانە، چی دەبێت بکرێت؟

نادر عبدالحمید: ئەوەی کە دەبێ بکرێت؛ ئاسۆدارکردن، ڕێکخستن و ڕابەرایەتی کردنی ناڕەزایەتیەکانە بۆ شکڵدان بە بزوتنەوەیەکی بەهێز، پشستبەستوو بە ڕێکخراوە کرێکاری و جەماوەری و شۆراکان؛ نەک هەر بۆ بەدەستهێنانی خزمەتگوزاریەکان، موچە دواکەوتووەکان، بیمە کۆمەڵایەتیەکان و دژی پێشێلکاری دەسەڵات بۆ ئازادیەکان، بەڵکو بۆ هەڵپێچانی دەسەڵاتێک کە بەرپرسی یەکەمی هەموو گیروگرفتەکانە لە کوردستاندا. ئەمە لە هەمانکاتیشدا ڕێگەی واقعی و سۆشیالیستیشە بۆ ڕووبەڕووبونەوەی دەستدرێژیەکانی دەوڵەتی ناوەندی و پلەدوویی و ستەمی نەتەوایەتی، (نەک هەوڵدان بۆ سەربەخۆیی کوردستان). شکڵدان بە بزوتنەوەیەکی لەو چەشنەی سەرەوە، پێویستی بە یەکگرتوویی ڕابەرانی مەیدانی و هەڵسوڕاوانی ناڕەزایەتیەکانە، کە بەدەوری خۆشی پێداویستی دیالۆگ و گەیشتن بە پلاتفۆڕمێکی هاوبەشیش دێنێتەئاراوە بۆ هاوئاهەنگی کار و چالاکی حزب، ڕێکخراو، گروپ و مەحفەلە سیاسیەکانی چەپ و کۆمۆنیزمی کوردستان.

This e-mail address is being protected from spambots. You need JavaScript enabled to view it

14-12-2017

Last Updated on Tuesday, 26 December 2017 15:41
 

بابه‌تی هه‌ڵبژارده‌

ناوەندی خەبات، ئاسۆ و ئەرکەکان

News image

ناوەندی خەباتی کرێکاری و جەماوەری لە کوردستان بۆ داگرتن یا خوێندنەوەی لە شکڵی (پی دی ئێف) کل...

خۆپێشاندانەکان و پڕاتیکی کۆمۆنیستی

News image

  خۆپێشاندانەکان و پڕاتیکی کۆمۆنیستی (سەبارەت بە بنەما فکری و سیاسیەکانی بڕیارنامەی ڕەوەند: خۆپێشاندانەکان و ئاسۆی پێشڕەوەی) نادر ...

بڕیارنامەی ڕەوەند: خۆپێشاندانەکان و ئاسۆی پێشڕەوی

News image

  1. زیاتر لە مانگ و نیوێك تێپەڕیوە بەسەر تەقینەوەی ناڕەزایەتی بەشێکی زۆری شار و شارۆچکەکانی ...

مانیفێستی "ڕەوەند" لە بارودۆخی سیاسی ئێستای کوردستاندا

News image

  ڕەوەندی سۆشیالیستی کرێکاری: مانیفێستی "ڕەوەند" لە بارودۆخی سیاسی ئێستای کوردستاندا 1. بارودۆخی سیاسی ئێستای کوردستان، ڕەنگدانەوە و ...

هاوپشتی کرێکاری ژمارە 1 ئۆکتۆبەری 2010

هاوپشتی کرێکاری ژمارە 1 ئۆکتۆبەری ...


تۆ لێره‌ی  : سه‌ره‌تا بابه‌ته‌کان بەشداری نادر عبدالحمید لە "فۆڕومی دۆخی نوێی کوردستان و چی دەبێ بکرێ!"