ڕه‌وه‌ند

بەیاننامەى یەكێتیی سۆسیالیستەكانی خۆرهەڵاتی ناوەڕاست Print
Wednesday, 06 December 2017 18:48

یەكێتیی سۆسیالیستەكانی خۆرهەڵاتی ناوەڕاست

24. نۆڤەمبەر. 2017

ئێمەی یەكێتیی سۆسیالیستەكانی خۆرهەڵاتی ناوەڕاست دژی هەموو دەسەڵاتە ئیمپریالیستییە نێودەوڵەتیی و ناوچەییەكان و جەنگەكانیان دەوەستینەوە. چ ئەمریكا، ڕووسیا، چین یان ئیسرائیل، عەرەبستانی سعوودییە، ئێران، توركیا. ئێمە هەروەها دژی ڕژێمە دەسەڵاتخوازەكانی وەك ئەسەد لە سوریا و سیسی لە میسر و هەروەها دژی فەندەمێنتالیزمی ئایینی، چ داعش و قاعیدە بێت یان چ حزبوڵا و ئیخوان موسلمین بێت. ئەگەرچی ئیخوان موسلمین و حزبوڵا خۆیان بە پەیڕەوكاری ڕیفۆرمە هەنگاو بەهەنگاوەكان و دژی جیهادیزمی قاعیدە و داعش دەبینن، بەڵام هەموویان ئامانجیان دامەزراندنی دەوڵەتێكە لەسەر بنەمای یاساكانی شەریعەت و ئامانجیان پاراستنی نەزمی سەرمایەداریی هەنوكەییە.

 

ئێمە دژی سەرمایەداریی، دابەشكاریی چینایەتیی، باوكسالاریی/سێكسیزم، ڕاسیزم، چەوساندنەوەى نەتەوەیی و ئایینین و پشتیوانیی لە خەباتەكانی ژنان، كرێكاران، نەتەوە ستەملێكراوەكانی وەك كوردەكان و فەڵەستینییەكان و كەمینە ئایینیی و ئەتنیكیی و ڕەگەزییەكان (سێكسوال) دەكەین. هەروەها دژ و نەیاری ئیسلامۆفۆبیا (ترس لە ئیسلام) و دژایەتیكردنی جولەكەین.

ئێمە خەبات بۆ سۆسیالیزم دەكەین وەك ڕزگاریی ئینسانیی و ڕوانگەیەكی پۆزەتیڤ و ئەرێنیی و بونیادنەر كە جیاوازە لەو ڕژێمە دەسەڵاتخوازانەى خۆیان بە "كۆمۆنیست" ناودەبرد.

هەوڵدان بۆ پێكهێنانی یەكێتیی سۆسیالیستەكانی خۆرهەڵاتی ناوەڕاست، لە بنەڕەتدا لە ئازاری 2016 وەك شێوەیەكی یەكێتیی سۆسیالیستە سوری و ئێرانییەكان دەستیپێكرد. یەكێتییەك بە وێب سایتێكی سێ زمانیی (ئینگلیزیی، عەرەبیی، فارسیی) دەستیپێكرد و هەوڵیدا تا خواست و داواكارییەكانی "خۆرهەڵاتی ناوەڕاستێكی دیكە" هاوشانی شیكارییەكانی كێشە هەنوكەییەكان بخاتەڕوو و گتفوگۆ و پەیوەندییە تازە سۆلیدارییەكان لەنێوان سورییەكان و ئێرانییەكان دروستبكات، كە دژایەتیی ڕژێمە دەسەڵاتخوازەكانی خۆیان دەكەن.

لەوكاتەوەى چارەنووسی خەڵك لەسەر سنوورەكانەوە، بەیەكەوە بەستراوەتەوە، گەشە و وەرچەرخانە گرنگەكانی ناوچەكە – هەندێكیان مەترسیدار و هەندێكی دیكەیان هیوابەخش – ئێستا بزوێنەرەكانی بونیادنانی یەكێتییەكە فراوانتر بووە. وەرچەرخانەكان بەمجۆرەن:

* هەموو ئەو شتەى لە شۆڕشی سوریا مابووەوە، بەتەواوی وێران بووە و لەناوچووە. ڕژێمەكەى ئەسەد بە كۆمەكی ئێران و ڕووسیا جاڕی سەركەوتنی لێداوە و ئێستا سەرەڕای ئەوەى بەرپرسی كوشت و كوشتاری زیاتر لە 500 هەزار ئینسانی بێ گوناه و ئاوارەبوونی 12 ملیۆن یان نیوەى دانیشتووانی سوریایە، كەچی وەك حكومەتێكی "شەرعیی و خاوەن ڕەوایی" ناسراوە و دانی پیادا نراوە. ئێستا یەك ملیۆن كەس لە سوریادا لەژێر ئابڵوقەى ئەم ڕژێمەدا دەژین و لانیكەم سەد هەزار كەس زیندانیی سیاسیین و ڕۆژانە ئەشكەنجە دەدرێن و بەگشتیش لە زیندانەكانی ئەسەددا دەمرن.

* بانگەشەی زۆرێك لەو چەپانەى دەیانگوت پڕۆژەى كۆنفیدرالیزمی دیموكراتیی ڕۆژاڤا لە باكووری سوریا دەیتوانی درێژە بە پێكەوەژیان لەگەڵ ڕژێمەكەى ئەسەددا بدات، ڕۆژ بەڕۆژ بێ بنەماتر دەبێت. ڕژێمەكەى ئەسەد دوای دڵنیابوونەوە لە سەركوتكردنی شۆڕشی سوریا، فشار و زەختەكانی خۆى لەسەر ناوچە كوردییەكان زیاتر و زیاتر كردووە. لەهەمانكاتدا، هەموو دەوڵەتە ناوچەیی و نێونەتەوەییەكان دژایەتیی مافی چارەی خۆنووسینی كوردەكانیان لە سوریا، عێڕاق، توركیا و ئێران كردووە. توركیا بەردەوام خەریكی هەڕەشە و هێرشەكانییەتی بۆسەر ناوچە كوردییەكانی سوریا و هێرشەكانیشی بۆسەر ناوچە كوردییەكانی توركیا بەردەوامە. دەوڵەتی ئیسرائیل بەهۆكارگەلی ئۆپۆرتۆنیستانە بەرگریی لە ئایدیای كوردستانی سەربەخۆ دەكات چونكە بەدوای پشتیوانەیەكی نوێدا دەگەڕێت لەناوچەكەدا دژی ئێران.

* ڕژێمە دەسەڵاتخوازەكان لەهەموو ناوچەى خۆرهەڵاتی ناوەڕاستدا خەریكی پیادەكردنی سەركوتی زیاتر و بەهێزكردنی دەسەڵاتی خۆیانن دژی چینە جەماوەرییەكان. ئەم پرۆسەیە لە جەنگی خوێناویی عەرەبستانی سعوودیە لە یەمەن، شەپۆلی ڕەشبگیرییەكان و حەبسكردنەكانی هێزە نەیارەكان لەلایەن دەوڵەتی توركیاوە، ئاستی سەركوتی پیادەكراو لەلایەن دەوڵەتی میلیتاریی لە میسر لەئاستێكی بەرزتر لە ڕژێمی پێشووی حوسنی موبارەك لە 2011دا دەكرێت ببینرێنەوە و تێبینیی بكرێن. لە میسر بەشێك لە چەپەكان لە ساڵی 2013دا پشتیوانیان لە كودەتای میلیتاریی دژی حكومەتەكەى ئیخوان موسلمین كرد. ئەوان لەبری پێشكەشكردنی ئۆپۆزیسیۆنێكی دیموكراتیی و ئەخلاقی دژی هەموو سەركوتێكی دەوڵەتیی و نادەوڵەتیی، پشتیوانییان لەسەركوتكردنی ئیخوان موسلمین كرد لەلایەن حكومەتی میلیتاریی تازەوە.

* دوو هاوپەیمانیی نوێ، یەكێكیان هەڵبژاردەى عەرەبستانی سعوودی و هاوپەیمانەكانی كە ئێستا ئیسرائیلیش هاتۆتە پاڵییەوە و ئەویدیكەیان پێكهاتووە لە ئێران، توركیا، قەتەڕ و هاوپەیمانەكانیان بۆ كۆنتڕۆڵكردنی ناوچەكە و سەرمایەكانیان كێبڕكێ دەكەن. عەرەبستانی سعوودی و لایەنگرانی لەسەر ئەو پشتیوانییە وەستاون كە دۆناڵد ترەمپ لە دوایین سەفەریدا بۆ خۆرهەڵاتی ناوەڕاست بە ڕێككەوتنێكی 110 ملیار دۆلار بۆ فرۆشتنی چەك بە عەرەبستانی سعوودیە. ئێران و هاوپەیمانەكانی لەسەر پشتیوانیی ڕووسیا حساب دەكرێن. ڕووسیا و چینیش ڕێگای سوودوەرگرتنیان لەهەردوو بەرەكە گرتووەتە بەر.

سەرۆكی نوێی ئەمریكا، دۆناڵد ترەمپ و سەرۆك وەزیرانی ئیسرائیل، بنیامین نەتەنیاهو هەڕەشەكانی خۆیان بۆ ڕاگەیاندنی جەنگ دژی ئێران هەڵكشاندووە. ئەگەرچی ئیدارەكەى ترەمپ بانگەشەى دژایەتیكردنی ڕژێمەكەى ئەسەد دەكات، بەڵام دەستێوەردانە ئیمپریالیستییەكانی لەڕاستیدا یارمەتی ڕژێمەكەى ئەسەدی داوە و هێرشە ئاسمانییەكانی دژی خەڵكی مەدەنیی بێ گوناهی سوریا، عێڕاق و ئەفغانستان هەڵكشاندووە، ئەو هێرشە ئاسمانیانەى لەلایەن ئیدارەى بۆش و ئۆباماووە دەستیپێكرد. بانگهێشتی ترەمپ و نەتەنیاهۆ بۆ "گۆڕینی ڕژێم" لە ئێران تەنها لەپێناوی بردنەپێشەوەى ئامانجە ئیمپریالیستییەكانیانە و كەمپینەكانیان تەنها دەبێتە هۆى جەنگ و لەناوبردنی خەباتە پێشكەوتووخوازییە ڕاستەقینەكانی ناوخۆی ئێران.

* كۆڵۆنیالیزم، میلیتاریزم، ئاپارتاید و ڕاسیزمی ئیسرائیل، دەستیكردووە بە كوشتن و سەركوتكردنی فەڵەستینییەكان لە وێست بانك، كەرتی غەزە، خۆرهەڵاتی ئۆرشەلیم و هەموو ئەو شوێنانەى لەڕووی مێژوویی فەڵەستینەوە یان "زەوییەكانی فەڵەستین لە 1948"دا لەقەڵەم دەدران. داگیركردنی زەوییەكانی فەڵەستینییەكان و میلیتاریزم هەروەها هەڵكشانی نایەكسانییە چینایەتییەكان، سێكسیزم و ڕاسیزمی ناوەوەى ئیسرائیلی مومكین و باوكردووە. لەهەلومەرجی هەنوكەییدا، وێڕای ڕابەرایەتیی ڕاستڕەو-توندڕەوی ئیسرائیل و یەكێتیی نێوان ئیسرائیل، عەرەبستانی سعوودیە و ئەمریكا كە ئامانجیان لەناوبردنی خەباتی فەڵەستینییەكانە لەپێناو دیاریكردنی مافی چارەنووسی خۆیاندا، نە ڕێگاچارەى دوو وڵات و نە ڕێگاچارەى یەك وڵات لەسەر بنەمای جیاكردنەوەى دین لەدەوڵەت، وەك شتێكی مومكین دەرناكەوێت.

بەڵام هەندێك لە وەرچەرخانە هیوابەخشەكان بریتییە لەوەى ئارەزووی ڕزگاربوون لەناوچەكە، هێشتا سەركوت نەكراوە

* ناڕەزایەتییە تازە و بەردەوامە كرێكارییەكان دژایەتیی خۆیان بۆ هەژاریی هەڵكشاو و هەلومەرجی كارەساتباری كار پیشانداوە، هەلومەرجێك كە ڕژێمی ئێران بە فراوانكردنی دەستێوەردانە ئیمپریالیستییەكان لە سوریا، عێڕاق، لوبنان و یەمەن دەیەوێت ئەم ناڕەزایەتییانە بشارێتەوە. ئەگەرچی خەباتە كرێكارییە هەنوكەییەكان پەیوەندییەكی ڕاستەوخۆیان لەنێوان هەژاری بەشێكی گەورەى دانیشتووانی وڵات و میلیتاریزم و ئیمپریالیزمی ناوچەیی دەوڵەتی ئێران بەرجەستە نەكردووە، ئەم خەباتانە تاوانایەكی پۆتێنشیەلی بوون بە بزووتنەوەیەكی جەماوەریی و پێشكەوتووخوازیان بۆ عەدالەتی كۆمەڵایەتیی هەیە.

* وێڕای سەركوتی بەردەوام لە میسر، تونس و بەحرین، خەباتە كرێكارییەكان بۆ مافە دیموكراتییەكان لەم وڵاتانەدا بەردەوامە.

خەباتی فیمینیستەكان و LGBT (لیزبیەن، گەى، بیسێكسواڵ، ترانسجێندەر – ئەوانەى ڕەگەزیان گۆڕیوە) لە خۆپیشاندانە جەماوەرییەكان لە توركیا دژی ڕژێمی دەسەڵاتخواز و كۆنەپارێزی ئەردۆغان بەشدارییان كردووە. ئەو ڕژێمەى دوای كودەتای تەممووزی 2016 هەوڵیداوە دەوڵەتێكی پۆلیسیی پێرفێكت و بەرچاو دابمەزرێنێت. لە میسر، چالاكوانانی فیمینیست و مافەكانی مرۆڤ وەك ماهینور ئەلماسری و چالاكوانانی LGBT وێڕای زیندانیكردن، هێشتا خەبات بۆ عەدالەتی كۆمەڵایەتیی دەكەن. لە لوبنان، چالاكوانانی ژنان كەمپینێكیان بۆ ڕەتكردنەوەى یاساكانی "هاوسەرگریی بە دەسترێژكردن" ڕێكخستووە. لە عێڕاق، ژنان خەبات بۆ ڕیفۆرمی دەستوور لەسەر بنەمای ڕەتكردنەوەى مافی ژنان لە یاساكانی خێزاندا دەكەن. لە ئێران، فیمینیستە زیندانیكراوەكانی وەك نەرگس محەمەدی، گوڵڕەخ ئیبراهیمی ئیرایی، و چالاكوانی كورد و مافی ژنان، زەینەب جەلالیان هەمیشە بانگەشە بۆ مافەكانی مرۆڤ دەكەن.

* لە مەراكیش لە ساڵی 2017، ڕێكخستنی جەماوەریی لە ڕیف بەردەوام بوو. ئەم خەباتە وێڕای سەركوتكردن لەلایەن هێزە ئەمنییەكان و هەوڵی ڕژێم بۆ بێ بەهاكردنی بزووتنەوەكە، كەچی دزەى كردە نێو شارەكانی دیكەی وڵاتەوە.

* خەباتی كوردەكان بۆ دیاریكردنی مافی چارەى خۆنووسینی خۆیان بەردەوامە و دەبێت پشتیوانیی لێبكرێت. ئەم خەباتە لە فۆرمە جۆراوجۆرەكانی وەك خواستی سەربەخۆیی، فیدراڵیزم، كۆنفیدرالیزم و بەڕەسمی ناسینی كوردەكان وەك بوونەوەرێك بە مافی یەكسانەوە لە وڵاتێكدا، دەركەوتووە. هەموو سۆسیالیستەكان كۆك نین لەسەر ئایدیا و بیرۆكەى كوردستانی سەربەخۆ و هەندێكیان ڕەخنەی دروستیان لە پارتە جیاوازە كوردییەكان گرتووە. ڕەخنەگەلێك دەربارەى سیاسەتەكان و پیادەكردنی دەسەڵاتخوازییان و هاوكارییان لەگەڵ وڵاتانی ئیمپریالیستدا. بەڵام هاوپشتیی و سۆلیدارێتیی ڕەخنەیی لەگەڵ پارتەكان و ڕێكخراوە كوردییەكاندا كە دژایەتیی سەرمایەداریی و ئیمپریالیزم دەكەن و پشتیوانیی لە مافەكانی ژنان، جیاكردنەوەى دین لە دەوڵەت و مافەكانی دیكەى كەمینە ستەملێكراوەكان دەكەن، كارێكی زەرووریی و هەنوكەییە.

بە لەبەرچاوگرتنی ئەم وەرچەرخانە ناوبراوانەى سەرەوە، یەكێتیی سۆسیالیستەكانی خۆرهەڵاتی ناوەڕاست، لەسەربنەمای ئامانجەكانی خوارەوە پێكهاتووە:

  1. دژایەتیكردنی سەرمایەداریی، میلیتاریزم، دەسەڵاتخوازیی، ئیمپریالیزم، فەندەمێنتاڵیزمی ئایینی، باوكسالاریی/سێكسیزم/ ترسان لە هاوڕەگەزخوازیی، ڕاسیزم، چەوساندنەوە ئەتنیكیی و ئاینییەكان.
  2. پەرەپێدان و بونیاندانی پەیوەندیی و فۆرمە چالاكەكانی سۆلیداریتیی نێوان خەباتە كرێكاریی، فیمینیستیی، دژەڕاسیستیی، LGBT، خوێندكاران و خەباتە ژینگەپارێزەكان لەئاستی خۆرهەڵاتی ناوەڕاست و جیهاندا.
  3. ڕووبەڕووبوونەوە لەگەڵ كێشە قوڵ و مێژووییەكانی سۆسیالیزمی خۆرهەڵاتی ناوەڕاست. ناوچەى خۆرهەڵاتی ناوەڕاست هێشتا لەسەر بنەمای سیاسەتەكانی "دوژمنی دوژمنەكەم دۆستمە" ژەهراوی كراوە كە هەوڵدان بۆ بونیادنانی ڕوانگەیەكی ئەرێنی بۆ ئەڵتەرناتیڤێكی ئینسانیخوازانە دژی سەرمایەداریی و لەسەربنەماى چەمكەكان و ئامانجە گەردوونییەكان، غیاب بووە. لە ئەنجامدا، بزووتنەوە شۆڕشگێڕییەكان یان پێشكەوتووخوازەكان و لەم دواییانەشدا ئەو بزووتنەوانەى لە ساڵی 2011دا دەركەوتن، لەلایەن سیستەمە دەسەڵاتخوازە سەرمایەداریی، توندڕەوە ئایینیی و فیڕقەگەراییەكان و بەكۆمەكی هێزە ئیمپریالیستییە ناوچەیی و جیهانییەكان لەناوبراون.

ئێمەى ئیمزاكەرانی ئەم بەیاننامەیە كۆبووینەتەوە تا بەشێوەیەكی دەستەجەمعیی و لە وێبسایتێكی هاوبەشدا لەڕێگای بەرپاردنی كۆنفرانسە هاوبەش و چالاكییە مومكینەكانی دیكەوە لەسەر ئەم كێشە و گرفتانە بووەستین و هەڵوەستەیان لەسەر بكەین. ئەم یەكێتییە شوێنێكە بۆ باس و گفتوگۆ بە مەبەستی گەیشتن بە ڕێگاچارەى ڕاستەقینە كە لەچوارچێوەى بیركردنەوەى سەرمایەدارییدا قەتیس نەبووە. هەموو ئەو كەسانەى دەیانەوێت پەیوەندیی بەم هەوڵەوە بكەن، تكا دەكەین لەڕێگای ئەم ئیمەیلەوە پەیوەندییمان پێوە بكەن.

This e-mail address is being protected from spambots. You need JavaScript enabled to view it

وەرگێڕانی بۆ كوردیی: پێشڕەو محەمەد

ئیمزاكەران

  1. فەریدا ئافاری، بەڕێوەبەری وێبلاگی وەرگێڕانی ئایدیا ئێرانییە پێشكەوتووخوازەكان، ئەمریكا.
  2. ڕۆیا ئەسەدپوور، ئەندامی ئێرانیی پارتی چەپی سوید، ئەوروپا
  3. لەیلا ئەسەدی، خوێندكار، ئەمریكا
  4. سەعید ئەفشار، ڕۆژنامەنووسی ئێرانیی، ئەوروپا
  5. لەیس ئەلتەمیزی، نووسەر و ڕۆژنامەنووس، فەڵەستین
  6. جویی ئەیوب، لێكۆڵەر و نووسەری لوبنانی، ئەوروپا و لوبنان
  7. بیبی، هونەرمەند و نووسەری سووریی، ئەمریكا
  8. حەمید جیهانبەخش، ڕۆژنامەنووسی ئێرانیی، ئەمریكا
  9. مافناسێكی سۆسیالیستیی ئێرانیی، لە بەجێماوانی خەباتەكانی دەیەى 60.
  10. مەروان ئەلخازن، فۆرمی سۆسیالیستیی، لوبنان
  11. ئەمین درودگەر، لێكۆڵەر، وەرگێڕ و ڕۆژنامەنووسی ئێرانیی، ئەوروپا
  12. مەهتاب دەهقان، كۆمەڵناس و ڕۆژنامەنووسی ئێرانیی، ئەوروپا
  13. سارا دەهكوردی، وانەبێژ لە زانستە سیاسییەكان و چالاكوان لە گروپی مەنجەنیق، ئەوروپا
  14. سینا زەكاوەت، كۆمیتەكانی دژەجەنگ لە هاوپشتیدا لەگەڵ خەباتەكان بۆ دیاریكردنی مافی چارەى خۆنووسین، ئەمریكا
  15. ئەحمەد. ڕ. خوێندكاری سووریی، ئەوروپا
  16. فواد ڕۆیحە، ڕۆژنامەنووسی سووریی ئیتاڵیی، ئەوروپا
  17. تاڕق سەمان، چالاكوانی ئاشتیخواز، فەڵەستین
  18. ئازادە شورمەند، لێكۆڵەری ئێرانیی لە بواری لێكۆڵینەوەى ژنان، ئەوروپا
  19. جۆزێف زاهیر، مامۆستای زانكۆی سووریی سویسریی، چالاكوانی سیاسیی و سەرپەرشتیاری وێبلاگی "سوریا الحریە للابد" ئەوروپا
  20. وەلید زەو، لوبنان
  21. عومەر عەباس، خوێندكاری سووریی، ئەمریكا
  22. ڕۆزان عەزاوی، لێكۆڵەری سووریی فەڵەستیینی و چالاكوانی سیاسیی، ئەوروپا
  23. فەرەح قەبیسی، لێكۆڵەر، فۆرمی سۆسیالیستیی، لوبنان
  24. ئەمین كیانپوور، ڕۆژنامەنووس و لێكۆڵەری ئێرانیی لەبواری فەلسەفەدا، ئەوروپا
  25. ڕیما ماجد، مامۆستای كۆمەڵناسیی، لوبنان
  26. نەسرین مەزاوی، ئەنترۆپۆلۆژ، چالاكوانی مافەكانی ژنان و ژینگە، فەڵەستین
  27. فاتیمە مستەوفی، لێكۆڵەری ئێرانیی لەبواری مێژوو، ئەوروپا
  28. عەسان مەكارم، فۆرمی سۆسیالیستیی، لوبنان
  29. فۆرمی سۆسیالیستیی لوبنان
  30. پێشڕەو محەمەد، چالاكوانی سۆسیالیستیی لە ناوەندی لێكۆڵینەوەى سۆسیالیستیی/كوردستان و ئەڵمانیا، ئەوروپا
  31. یاسر مونیف، مامۆستای كۆمەڵناسیی سووریی، ئەمریكا
  32. ناهید میساقی، سایكۆلۆژی ئێرانیی، ئەمریكا
  33. حسێن نەداوش، چالاكوانی كرێكاریی، ئێران
Last Updated on Wednesday, 06 December 2017 19:29
 

بابه‌تی هه‌ڵبژارده‌

ناوەندی خەبات، ئاسۆ و ئەرکەکان

News image

ناوەندی خەباتی کرێکاری و جەماوەری لە کوردستان بۆ داگرتن یا خوێندنەوەی لە شکڵی (پی دی ئێف) کل...

خۆپێشاندانەکان و پڕاتیکی کۆمۆنیستی

News image

  خۆپێشاندانەکان و پڕاتیکی کۆمۆنیستی (سەبارەت بە بنەما فکری و سیاسیەکانی بڕیارنامەی ڕەوەند: خۆپێشاندانەکان و ئاسۆی پێشڕەوەی) نادر ...

بڕیارنامەی ڕەوەند: خۆپێشاندانەکان و ئاسۆی پێشڕەوی

News image

  1. زیاتر لە مانگ و نیوێك تێپەڕیوە بەسەر تەقینەوەی ناڕەزایەتی بەشێکی زۆری شار و شارۆچکەکانی ...

مانیفێستی "ڕەوەند" لە بارودۆخی سیاسی ئێستای کوردستاندا

News image

  ڕەوەندی سۆشیالیستی کرێکاری: مانیفێستی "ڕەوەند" لە بارودۆخی سیاسی ئێستای کوردستاندا 1. بارودۆخی سیاسی ئێستای کوردستان، ڕەنگدانەوە و ...

هاوپشتی کرێکاری ژمارە 1 ئۆکتۆبەری 2010

هاوپشتی کرێکاری ژمارە 1 ئۆکتۆبەری ...


تۆ لێره‌ی  : سه‌ره‌تا بابه‌ته‌کان بەیاننامەى یەكێتیی سۆسیالیستەكانی خۆرهەڵاتی ناوەڕاست