ڕه‌وه‌ند

هەر ئێستا لە پارەی دزراوی خەڵك دەبێ موچەکان بدرێن! Print
Tuesday, 31 October 2017 22:16

ناوەندی خەباتی کرێکاری و جەماوەری کوردستان

تەسلیم بوونی "یەکیەتی" و "پارتی" و "حکومەتی هەرێم"ەکەیان بە دەسەڵاتدارانی دژە کرێکار و زەحمەتکێشی دەوڵەتی عێڕاق، کوردستانی خستۆتە ناو بارودۆخێکی قەیراناوی هەمەلەلایەنە و تڕاژیدیایەکی واقعی چاوەڕێی خەڵكەکەیەتی. گەر بەر لە ڕیفڕاندۆم و ئاشبەتاڵی 26 ی ئۆکتۆبەر خەڵكی بەفشاری ناڕەزایەتیەکانیانەوە چاوەڕوانی نیوە موچەی چەند مانگ جارێک بوون، ئەوا ئەمڕۆ ئەم چاوەڕوانیەش بەباچوو.

 

دەسەڵاتدارانی گەندەڵ و ملکەچی ئێستای کوردستان، کە لە ڕابردوودا ئەو هەموو سەروەتوسامانەی سەرزەوی و ژێرزەویەیان لەبەردەستدابووە بەو حاڵەشەوە نەک هەر نەیانتوانی لانی کەمی خزمەتگوزاریە سەرەتاییەکانی ژیان بۆ هاوڵاتیانی کوردستان و موچەی کارمەندان و کرێکاران دابین بکەن، بەڵکو حوکمەتە گەندەڵ و دژە ئازادیەکەشیان، وەک ئامارەکان ئاماژەی پێدەدەن، بڕی 28 بیست و هەشت ملیار دۆلار قەرزدارە کە دەبێ مناڵەکانمان و نەوەکانی ئایندەی کوردستان باجەکەی بدەن.

جا ئەم دەسەڵاتە کە زۆرێک لەو توانا و ئیعتیبارە ئابووریانەی کە پێشتر هەیبوو لە ئاستی ناوخۆیی و نێودەوڵەتیدا، ئێستا لەدەستیداوە، ئاخۆ دەبێ کرێکار و زەحمەتکێشی کوردستان و هاوڵاتیان چ چاوەڕوانیەکیان لەو دەسەڵاتە گەندەڵ و ملکەچ و موفلیسە هەبێت؟!! بەواقعی دەسەڵات ئەمڕۆ هیچ شتێکی لە توێشوەکەیدا نەماوە جگە لە دامودەزگای داپڵۆسێنەر و سەرەنێزە بۆ گیانی خەڵك.

بەرنامەی "پارتی" و "یەکیەتی" و "حکومەتی هەرێم"ە موفلیسەکەیان، بۆ چارەسەری موچە و برسیەتی و هەژاری، وێڕای فریودانی خەڵك و خۆ ئامادەکردن بۆ سەرکورتی ناڕەزایەتیەکانیان خەریکی پاڕانەوە و سواڵکردنن لە دەوڵەتی ناوەندی عێڕاق کە هەرچی زووتر ئیمزای دۆڕاوی و ملکەچیان لێ قبوڵبکات و لەو چوارچێوەدا کە حکومەتی "عەبادی" مەرحەمەتیان پێدەکات بەشە بودجەی کوردستان جارێکی تر بنێردرێتەوە.

هاوڕای ئەمە، ڕێگەچارەی لیبراڵ قەومیەکانی کوردستان و نیوە ئۆپۆیسیۆنێکی قەومی ئیسلامی کە هێشتا وەزیرە دەرکراوەکانیان بە ڕەسمی لە حکومەتی بنکە فراوان (ی پارتی و یەکیەتی) دەستیان نەکێشاوەتەوە، بریتیە لە فشار هێنا بۆ "پارتی" و "یەکیەتی" بۆ ناچارکردنیان بە پێکهێنانی "حکومەتێکی ڕزگاری نیشتیمانی" و دانوسان لەگەڵ دەوڵەتی ناوەندی و ئاسایی کردنەوەی پەیوەندی ناوەند و هەرێم و ناردنەوەی بەشە بودجە بۆ کوردستان، ئەمەش واتا هەر هەمان شت کە ئێستا "پارتی" و "یەکیەتی" و حکومەتەکەیان خەریکیەتی، ئەمجارە بە هاوبەشی هەمویان پێکەوە بچنە بەغدا بەشکم کەمێک زوتر "عەبادی" لای مەرحەمەتیان لێبکاتەوە و شتێک زیاتریان پێبدات. بەڵێ ئەم ڕێگە چارەش واتا چاوەڕوانی بەدیار ئەم هەموو کەینوبەینەوە کە نازانرێت چەند مانگ دەخایەنێت ئەوسا بیر لە موچە و چارەسەری وەزعی داڕوخاوی ژیان و بژێوی خەڵكی کرێکار و زەحمەتکێشی کوردستان بکرێتەوە، ئەویش شتێکی زیاتر نابێت لەو ژیانە کولەمەرگیەی کە پێشتر بوومانە.

کرێکاران، زەحمەتکێشان و جەماوەری ئازادیخوازی کوردستان، چاوەڕوانی بە دیار ڕێگەچارەی دەسەڵات و ئۆپۆزیسیۆنەکەیەوە لە باشترین حاڵەتیدا دانیشتنە بەدیار ژیانێکی کولەمەرگیەوە کە پێشتر بەردەوام ناڕەزایەتیمان دەربڕیوە بەرامبەری و بەدژی هاتووینەتە مەیدان. ئیتر ئەم ژیانە کولەمەرگیە، ئەم ناعەدالەتی و ناڕەواییە بەسە. ئەمڕۆ ڕۆژی هاتنە مەیدانی خۆمانە بۆ وەستانەوە بەڕووی ئەو ناعەدالەتی و ناڕەوایی و ژیانە کولەمەرگیەی کەبەسەریاندا سەپاندووین.

کۆمەڵگە پڕیەتی لە سەروەتوسامان، پڕیەتی لە ملیۆنلەر و ملیاردێر کە لەسەر حیسابی ڕۆژ ڕەشی ئێمە پێی گەیشتوون. ئێمە خوازیاری ئەوەین و لە هەوڵی ئەوەشدا دەبین کە سامانی دزراوی کۆمەڵگە هەرچی زووتر دەستی بەسەراگیرێت و بگەڕێندرتەوە بۆ خەڵك و هەر ئەمڕۆ و بەبێ دواکەوتن موچەکان و خزمەتگوزاریەکان و خۆشگوزەرانی خەڵك لە پارە و ئیمکاناتی دزراوی گشتی کۆمەڵگە دابین بکرێن. ئەوەی کە ڕێگرە لە بەردەم چارەسەرێکی ئاوادا ناڕێکخراوبوون و نایەکگرتوویی خۆمانە.

ئەمڕۆ کاتی ئەوەیە کە ناوەندەکانی خەبات لە شار و شارۆچکە و گەڕەکەکان، لە گارگە و خوێندگاکان، لە دائیرە و دامەزاراوە دەوڵەتیەکاندا ڕاگەێنین، ڕێگەچارەی خۆمان بخەینەڕوو بۆ بەرنگاربوونەوەی هەژاری و برسیەتی، و دەستبەکاریش بین بۆی.

29-10-2017

Last Updated on Tuesday, 31 October 2017 22:58
 

بابه‌تی هه‌ڵبژارده‌

ناوەندی خەبات، ئاسۆ و ئەرکەکان

News image

ناوەندی خەباتی کرێکاری و جەماوەری لە کوردستان بۆ داگرتن یا خوێندنەوەی لە شکڵی (پی دی ئێف) کل...

خۆپێشاندانەکان و پڕاتیکی کۆمۆنیستی

News image

  خۆپێشاندانەکان و پڕاتیکی کۆمۆنیستی (سەبارەت بە بنەما فکری و سیاسیەکانی بڕیارنامەی ڕەوەند: خۆپێشاندانەکان و ئاسۆی پێشڕەوەی) نادر ...

بڕیارنامەی ڕەوەند: خۆپێشاندانەکان و ئاسۆی پێشڕەوی

News image

  1. زیاتر لە مانگ و نیوێك تێپەڕیوە بەسەر تەقینەوەی ناڕەزایەتی بەشێکی زۆری شار و شارۆچکەکانی ...

مانیفێستی "ڕەوەند" لە بارودۆخی سیاسی ئێستای کوردستاندا

News image

  ڕەوەندی سۆشیالیستی کرێکاری: مانیفێستی "ڕەوەند" لە بارودۆخی سیاسی ئێستای کوردستاندا 1. بارودۆخی سیاسی ئێستای کوردستان، ڕەنگدانەوە و ...

هاوپشتی کرێکاری ژمارە 1 ئۆکتۆبەری 2010

هاوپشتی کرێکاری ژمارە 1 ئۆکتۆبەری ...


تۆ لێره‌ی  : سه‌ره‌تا بابه‌ته‌کان هەر ئێستا لە پارەی دزراوی خەڵك دەبێ موچەکان بدرێن!